Pse lakuriqi del për gjah vetëm natën?

Jetonte lakuriqi i natës në shtëpizën e vet dhe asnjë mbreti nuk pranonte t’i paguante taksë. Një ditë mbreti i bishave, i inatosur, thirri pranë luftëtarët dhe i urdhëroi: I shkoni në shtëpi lakuriqit e i thoni të më paguaj taksat! Luftëtarët vrapuan të përmbushin urdhrin.
Arritën te ai dhe i thanë: O lakuriq i natës, erdhëm t’i marrim taksat! Lakuriqi i ndërpreu dhe u përgjigj: Taksat?! Vetëm këtë nuk e kuptoj! I thoni mbretit tuaj se unë nuk jam bishë dhe nuk do t’i paguaj. A ka vallë ndonjë tjetër kështu si unë, që ka krahë, me të cilët fluturon nëpër ajër, dhe që nuk ecën nëpër tokë, që t’i paguaj taksa mbretit të bishave? Unë nuk jam bishë, unë jam zog!
Mbreti u zemërua shumë. Vrau mendjen ç’të bënte me të dhe më në fund e gjeti. Thirri përsëri luftëtarët e tij dhe u tha: I shpini mesazhin tim mbretit të zogjve. Dhe të nesërmen mbreti i zogjve thirri luftëtarët e tij dhe u dha urdhër: I shkoni në shtëpi lakuriqit të natës. Ai është zog dhe duhet të paguaj taksat. Ai vetë paska thënë se është zog! Luftëtarët fluturuan për të përmbushur urdhrin. Fluturuan dhe i thane:- O lakuriq i natës, ne erdhëm për të marr prej teje taksat!
Lakuriqi ndërpreu së ngrëni pjeprin dhe u përgjigj:- Taksat?! Vetëm këtë nuk e kuptoj. I thoni mbretit se unë nuk do t’i paguaj atij taksat. A ka vallë ndonjë kështu si unë në këtë botë, i cili të ketë dhëmbë dhe t’i paguaj taksa mbretit të zogjve? Ju, a keni parë ndonjëherë që të kenë zogjtë dhëmbë?! Unë jam bishë nuk jam zog!
Mbreti i zogjve u zemërua shumë vrau mendjen ç’të bënte me të dhe më në fund e gjeti. Thirri luftëtarët e tij dhe u tha:- I shpini mesazhin mbretit të bishave. Ditën tjetër, pa e zgjatur punën, u morën vesh që t’i ngrinin një kurth lakuriqit dinak.
Që nga ajo kohë luftëtarët e mbretit të bishave dhe mbretit të zogjve çdo ditë kërkojnë atë anë e kënd. Ja pse lakuriqi i natës ditën fshihet, kurse ushqimin e kërkon vetëm natën.