Kosova - Rruga tek Pavarësia

Libri “Kosova, rruga te pavarësia” i autorit Ibrahim Gashi, i cili u promovua dje në Bibliotekën Kombëtare të Kosovës trajton procesin politik të përiudhës së pasluftës dhe shtetndërtimit të Kosovës, ku nëpërmjet analizave autori tenton t’ia shpjegojë publikut pozitën e shtetit më të ri dhe zhvillimet që pasuan me shpalljen e pavarësisë.
Recensenti i librit, Bajram Kosumi, ka thënë se autori është një analist i cili mundohet të shpjegojë proceset politike dhe se libri i tij hap rrugën për ndërgjegjësimin e klasës politike në raport me shtetin.
“Unë do të ndalem në një aspekt të librit dhe në një nga problemet më të theksuara. Është një libër i cili është shkruar në vazhdimësi përgjatë 10 viteve. Kryetema e këtij libri është procesi politik i Kosovës prej vitit 2000 deri në vitin 2010. Autori në të shpjegon proceset politike përse ndodhin ato. Është një libër i veçantë sepse autori tentoi të sugjerojë dhe të ndihmojë klasën politike dhe ka kryer detyrën e një intelektuali“, ka thënë Kosumi.
dërsa drejtoresha e Institutit për Studime Evropiane, Eva Tafili-Hyskaj, ka thënë se libri është një shtjellim analitik me një këndvështrim historik dhe politik për rrugëtimin e Kosovës.
“Duke u futur në brendësinë e librit autori e përshkruan trajektoren që ka ndjekur Kosova dhe populli shqiptar deri në datën sublime të çlirimit dhe më pas të shpalljes së pavarësisë, si sendërtim i ëndrrës shekullore shqiptare për të hequr tej zgjedhën serbe”, ka thënë Tafili.
Më tej redaktorja e librit ka përmendur edhe çështjen e identitetit kombëtar kosovar, të cilën Gashi e trajton në libër “Këtë çështje autori e trajton në dy rrafshe, në atë teorik, dhe në të praktik, të cilën e gjykon me argument. Për të vazhduar më pas me shtetndërtimin, me sfidat që ka kaluar dhe me ato që shteti i Kosovës i ka përpara, dhe në fund me “qershizën mbi tortë” që është anëtarësimi i Kosovës në OKB”.
Ndërsa autori i librit, Ibrahim Gashi, ka shpjeguar se në librin e tij, libër ky i zhanrit publicistik, është një përmbledhje e artikujve dhe vështrimeve politike të botuara dhe të prezentuara në një tekst të vetëm, të cilat, sipas tij, kanë të bëjnë me kohën kur Kosova arriti synimin e saj.
“Në këtë përmbledhje më shumë në cilësinë e një studiuesi dhe analisti kam shprehur të gjitha opinionet dhe shqëtësimet e mia për proceset politike që kalonte Kosova deri te shpallja e pavarsisë së saj”, ka thënë Gashi.
Më tej autori ka thënë se në këtë libër më shumë në cilësinë e një studiuesi dhe analisti ka shprehur opinionet, shqetësimet dhe jo rrallë edhe rekomandimet për klasën politike kosovare “Reflektimi im s’është tjetër veçse shprehje përkushtimi e shqetësimi dhe përpjekje për të ofruar një kontribut modest në rrjedhën e procesit të pavarësisë dhe ndërtimit të shtetit të Kosovës”.