Përse është i zi korbi !?

Ndoshta nuk e keni ditur po secila kafshë, shpend apo gjithçka tjetër, e ka marrë formën dhe ngjyrën për ndonjë arsye. Pikërisht ky tregim tregon se si korbi ka marrë edhe ngjyrën e tij, e cila është aq e errët, sa mund t’ia kalojë vetëm nata kur nuk ka fare hënë.

Kur Noe mblodhi të gjitha kafshët në barkën e tij, e cila do t’i shpëtonte nga përmbytja e madhe, korbi ishte i bardhë si qumështi dhe ai krenohej me bukurinë dhe ngjyrën e tij. Noe ia besoi pikërisht korbit eksplorimin e parë pas Përmbytjes së Madhe, sepse donte të dinte se çfarë kishte ndodhur me të vërtetë, pasi uji mbuloi tokën dhe shkatërroi gjithçka që i dilte përpara.

Mirëpo, korbi u vonua tri ditë e tri net duke fluturuar mbi botën e përmbytur duke ngrënë mbeturina të ndryshme, sikur kishte harruar se në çfarë misioni e kishte dërguar Noa. Më në fund u kthye te barka, por aty e gjeti Noan dhe të tjerët të xhindosur me vonesën e korbit dhe kështu vendosën që ta dënojnë për mosseriozitetin e tij. -Na le tri ditë e tri net në errësirë vetëm për të ngrënë plehra -, i bërtiti Noe. -Si ndëshkim, duke filluar nga sot, do të jesh i zi si errësira dhe do të hash vetëm mbeturinat e të tjerëve. Dhe ashtu u bë, kështu që nga ajo ditë, korbi ka ngjyrën e zezë dhe vërtet ushqehet me mbeturina të të tjerëve.