Fshatari dhe patat e pjekura..

Një fshatari të varfër i mbaroi tërë drithi. Atëherë mendoi të kërkonte hua tek një i pasur. Që të mos shkonte duarzbrazur tek ai, zuri një patë, e preu, e poqi dhe ia shpuri të pasurit. I pasuri e mori patën dhe i thotë fshatarit: “Të faleminderit për patën o fshatar. Po nuk më thua, si ta ndajmë patën që na solle? Ja, unë kam gruan, dy djem dhe dy vajza.

Si të bëjmë që ta ndajmë patën pa i mbetur kujt hatri?”. Dhe fshatari ia ktheu: “Ua ndaj unë”. Dhe ai mori thikën, preu kokën e patës dhe ia dha të pasurit: “Ti je koka e shtëpisë, andaj edhe do ta marrësh kokën”. Më pas preu bishtin dhe ia zgjati gruas së të pasurit. “Ti e ke vendin në shtëpi, të rrish e të bësh punët e shtëpisë, ndaj edhe do ta marrësh bishtin”, tha ai.

Pastaj preu këmbët dhe ua zgjati djemve. “Juve këmbët do gëzoni, në gjurmët e babait do të shkoni”, u tha atyre. Ndërsa vajzave ua dha krahët. “Ju së shpejti do të fluturoni nga shtëpia, ndaj merrni secila nga një krah. Ç’mbetet po e marr unë”. Dhe e mori gjithë patën. I pasuri vuri buzën në gaz, pastaj nxori e i dha fshatarit gjithë drithë dhe para. Merr vesh një fshatar i kamur se i pasuri për një patë shpërbleu fshatarin e varfër me drithë dhe para dhe poqi pesë pata dhe ia dërgoi të pasurit.

I pasuri i thotë atij: “Faleminderit për patat, mirëpo, unë kam gruan, dy djem dhe dy vajza dhe bëhemi gjithsej 6 veta. Si t’i ndajmë barabar patat e tua?”. Fshatari i kamur u mendua sa u mendua por nuk e gjeti dot. Pastaj i pasuri e dërgoi për ta thirrur fshatarin e varfër dhe i tha të ndante patat. Mori fshatari i varfër njërën patë dhe ia dha të pasurit dhe gruas së tij e u tha: “Ju bashkë me patën bëheni tre”.

Një patë tjetër ua dha djemve: “Edhe ju u bëtë tre”, u tha. Patën e tretë ua dha vajzave dhe u tha: “Edhe ju u bëtë tre”. Për vete mori dy patat e fundit. “Edhe unë u bëra tre”, foli ai. Tani jemi të gjithë barabar. I pasuri ia shkrepi gazit dhe përsëri mori dhe i dha fshatarit të varfër drithë dhe para, ndërsa të kamurin e dëboi.