Austriaku, baba i 600 fëmijëve

Një mashkull austriak, me vendbanim në Britani të Madhe, mund të jetë bërë baba i 600 fëmijëve nëpërmjet një klinike të fekondimit, të cilën e kishte themeluar vetë.
Sipas disa shkrimeve, biologu austriak Bertold Wiesner dhe bashkëshortja e tij kishin themeluar një klinikë fekondimi në Londër më 1940, në të cilën dy të tretat e depozitave të spermës ishin dhuruar nga vetë Bertoldi, një praktikë e cila sot është e ndaluar me ligj.
E vërteta është nxjerrë në pah nga dy meshkuj, të cilët po hulumtonin për prejardhjen e tyre bazuar në datën e ngjizjes së tyre në klinikën e Wiesnerit. Barry Stevens, filmbërës nga Kanadaja, dhe David Gollancz, nga Londra, i kanë shikuar të dhënat e ADN-së, të cilat sugjerojnë se Wiesner ishte në të vërtetë babai i tyre, sipas “The Daily Telegraph”.
Testeve të ADN-së i janë nënshtruar 18 njerëz, të cilët janë ngjizur në klinikë ndërmjet viteve 1943 dhe 1962. Rezultatet kanë dëshmuar se i ati i dy të tretave së këtyre fëmijëve ishte vetë Wiesneri.
Stevens dhe Gollancz më pas kanë shfrytëzuar këtë hulumtim për të nxjerrë një vlerësim të numrit të përgjithshëm të fëmijëve që mund të kenë Wiesnerin baba, dhe kanë zbuluar se rreth 600 fëmijë të ngjizur në klinikë janë të austriakut. (CP)