Dy gjelat, shqiponja dhe pula

Ndjenja e dashurisë nuk është e pranishme vetëm tek njerëzit, por ajo manifestohet fuqishëm edhe tek kafshët, duke përfshirë edhe shpezët. Dhe shpesh ndodh që për dashurinë edhe të luftohet e besa nganjëherë edhe të vdiset për të, varësisht se sa jeni të dashuruar në personin e caktuar. Mirëpo, ndodh shpesh që duke u mburrur se je më i fortë se kundërshtari yt, e pëson vet më së keqi.

Dhe pikërisht tregimi në fjalë flet për një rast të tillë, kur fitimtari për të fituar zemrën e një femre, e pëson keq, për shkak të mburrjes së tepruar. Kështu, dy gjela të dashuruar pas të njëjtës pulë përfunduan në kacafytje. Përleshja ishte shumë e ashpër dhe zgjati gjatë. Kishte edhe gjakosje mes tyre, por asnjëri nuk dëshironte të lëshonte pe, pasi secili prej tyre e donte pulën e bukur pikaloshe.

Por pas një kohe të gjatë përleshjeje, njëri nga gjelat u dorëzua, pasi u mund keq nga kundërshtari i tij. Ai që u mund shkoi të pushonte nën një gëmushë, duke ia lëshuar vendin gjelit fitimtar që të merrte trofeun e tij. Kështu gjeli fitimtar, për të treguar forcën e tij, u ngjit lart në çati dhe lëshoi që nga lart, me sa i hante gryka, britmën e fitores. - Kikiriki! Fitova unë! Por gjelit të gjorë nuk i shkonte mendja se mund të vëzhgohej nga ndonjë grabitqar. E dëgjoi shqiponja që po kalonte andej: u lëshua mbi të dhe e mbërtheu me kthetra dhe e mori me vete. Kështu, gjeli tjetër u martua me pulën dhe vazhduan të jetonin të lumtur e të qetë. Ky tregim tregon se kryelartësia pjell humbje. Nga Ezopi