Kalaja e Libohovës

Qyteti i Libohovës, me rreth 3.200 banorë, ndodhet ne juglindje të Gjirokastrës. Sipërfaqja e Libohovës është mbi 260 ha.. Lartësia e qytetit varion nga 320-800 metra mbi nivelin e detit.
Kufizohet me lumin e vogël Drino në perëndim, me Labovën e Kryqit dhe me lumin e Suhës në veri dhe në jug me Nepravishtën. Nga lindja kufizohet me malin Bureto.
Në këtë qytetet gjendet edhe kalaja e Libohovës apo e njohur si kalaja e Ali Pashë Tepelenës ndërtuar për të motrën e tij Shanishanë.
Kalaja kishte një pozicion strategjik dhe kontrollonte gjithë luginën. Zona ku shtrihet qyteti ndahet nga disa përrenj në zona të veçanta shkëmbore në të cilat burojnë ujërat e kristalta dhe të ftohta të burimeve të Zhepës, të Lozës etj.
Në qendër te Libohovës ndodhet rrapi shumëshekullor mbi 560 vjeçar, një monument i rrallë i natyrës, i cili është i rrethuar nga rrepë të tjerë. Ata i japin qytetit gjelbërimin, bukurinë dhe freskinë verore.
Gjithashtu bien në sy, në qendër të qytetit, sarajet e bejlerëve të Libohovës. Kalaja e Libohovës, me katër kulla shumëkëndëshe nëpër qoshet dhe murin që rrethon një sipërfaqe të gjerë, është një fortesë me përmasa të konsiderueshme.
Motra e Ali Pashë Tepelenës, Shanisha u martua me një nga anëtarët më të rëndësishëm të familjes Libohova dhe kalaja ishte paja e Ali Pashës për të motrën. Shanishaja prehet në varrezat në jug të kalasë.