Statuja e Lirisë

Statuja e Lirisë (anglisht Liberty Statue), ndoshta monumenti më i famshëm i botës, i është dhuruar zyrtarisht SHBA-ve nga populli francez, me rastin e 100-vjetorit të Revolucionit që solli çlirimin e kolonive nga Britania e Madhe. Me kalimin e viteve ajo mori një simbolikë tjetër, atë të lirisë e të demokracisë në botë. Ajo u kthye në një pararojë të ”botës demokratike”. Statuja gjendet në ishullin Liberty Island në Portin e Nju Jorkut dhe tregon zoten romake e lirisë, Libertas.

Vendimi për ta ndërtuar atë u mor më 1876, 100 vjet pas revolucionit Amerikan. Mirëpo për shkak të mungesës së fondeve dhe vështirësisë së realizimit të një vepre kaq gjigante, Statuja u ”ngrit në këmbë” në ishullin e saj vetëm 10 vjet më vonë, më 28 tetor 1886. Statuja e Lirisë paraqet një femër e cila në njërën dorë mban një flakadan, ndërsa në tjetrën një libër.

Kjo statujë është e lartë 46.5 m, të cilës i duhet shtuar edhe 46.9 m lartësinë e bazës. Autor i skulpturës është Frederik August Bartoldi, i ndihmuar nga inxhinieri Gustav Eiffel, autor i Kullës së famshme të Parisit. Ky monument madhështor, është edhe një pikë atraktive turistike, ku brenda një viti vizitohet nga miliona turistë nga e mbarë bota, ndërsa gjithashtu mund të gjendet edhe në kartolina të ndryshme.