Varrosen martirët e lirisë

Sot në Therandë janë varrosur mbetjet mortore të 27 personave, ndërsa në Krushë të Vogël mbetjet e 19 personave, të cilët kanë qenë të zhdukur gjatë luftës së fundin në Kosovë.

Liderët e institucioneve të Kosovës, kanë deklaruar se masakrat që janë bërë në Krushë të Vogël dhe në Therandë, dëshmojnë më së miri se forcat paramilitare dhe ushtarake serbe kanë kryer gjenocid.

Presidentja e Kosovës, Atifete Jahjaga, ka bërë sot homazhe para trupave të 27 personave të zhdukur gjata luftës në Therandë, ajo ishte edhe në fshatin Krushë e Vogël, me ç’rast ka bërë homazhe para trupave të 19 të zhdukurve të këtij fshati. Ajo ka thënë se varrosja e familjarëve, të cilët pamëshirshëm janë masakruar nga forcat ushtarake, paramilitare të okupimit serb, është një rast i rëndë, i vështirë dhe i dhembshëm. “Por, pavarësisht asaj që është një rast i rëndë, një rast i dhembshëm, gjithsesi është një ngushëllim për familjarët dhe për të gjithë ata që humbën më të dashurit e tyre, sepse tash e tutje kanë një vend, ku këta martirë të lirisë së Kosovës do të prehen përjetësisht. Ne me pietet kujtojmë sakrificën e të gjithë atyre burrave dhe grave, që ne sot të jemi një popull i lirë, të jemi një popull i dinjitetshëm, të jemi një popull sikur të gjithë popujt e tjerë të botës, me një të ardhme të sigurt drejt integrimeve euroatlantike dhe në miqësi të përjetshme me Shtetet e Bashkuara të Amerikës. Këta martirë të lirisë janë dëshmia më e mirë që ne jemi sot një popull i lirë, një popull sovran dhe një popull i pavarur, duke realizuar edhe idealin e gjeneratave të tëra”, ka thënë Jahjaga.

Ndërkaq, kryeministri i Kosovës, Hashim Thaçi, ka thënë se masakrat që janë bërë në Krushë të Vogël dhe në Therandë dëshmojnë më së miri se forcat paramilitare dhe ushtarake serbe kanë kryer gjenocid.

Ai ka thënë se bashkë me Shtetet e Bashkuara të Amerikës dhe Bashkimit Evropian, do të bëjnë trysni më të madhe ndaj Beogradit për gjetjen dhe kthimin e 1700 mbetjeve mortore.

Sipas kryeministrit Thaçi, Parlamenti Evropian së shpejti do ta miratojë një rezolutë me të cilët do t’i kërkojë Serbisë hapjen e të gjitha vendeve në të cilat dyshohet se ka trupa të shqiptarëve.

Mbetjet mortore të personave të pagjetur të familjeve Berisha dhe Bytyqi nga Theranda ishin gjetur në vitin 2001 në Batajnicë, Serbi, kurse personat e pagjetur nga Krusha e Vogël ishin gjetur në vitin 2003 në Shirokë të Therandës, si dhe në vitin 2012 gjatë një operacioni në terren të Departamenti i Mjekësisë Ligjore (DML) në poligonin e qitjes në Lubizhdë të Komunës e Prizrenit.

/epokaere.com/