Oda shqiptare

Oda është dhomë tradicionale shqiptare, dhe merret si dhoma më e madhe dhe më e mirë e shtëpisë, e cila ka vatrën dhe është e pajisur me disa zbukurime tradicionale shqiptare që vijojnë kryesisht nga mesjeta, por edhe më herët. Oda ka edhe kuptimin e një gjyqi, parlamenti apo më mirë të thuhet një forumi të parisë së një familjeje patriarkale, fisi, katundi apo qyteze.
Në odat familjare mbaheshin tubime që trajtonin problemet, mundësi të zhvillimit të gjithëmbarshëm dhe merreshin vendime për veprime në të ardhmen.
Është për t’u thënë që edhe gjatë sundimeve të huaja struktura e organizimit të jetës përbrenda shoqërisë shqiptare është mbajtur në jetë nga vendimet e Odës, familjet që nuk ju kanë nënshtruar vendimeve të saja janë injoruar dhe janë marrë si të huaja.
Duket që me ndikimin apo nga vetë tradita gjatë debatimeve janë përdorur teknika të ndryshme të të shprehurit të mendimit. Një nga këto teknika është edhe të diskutuarit me bejte, një e folme e fjalëve të zgjedhura të shqiptuara njëra pas tjetrës rrjedhshëm me një ritëm që si të tëra japin një si melodi.